Чӑваш Енӗн вӗренӳ министрӗ, унччен Информаци политикин министерствине ертсе пынӑ Алексакндр Иванов И.Я. Яковлев ячӗллӗ Чӑваш патшалӑх педагогика университечӗн ректорачӗ ҫумӗнче канашҫӑ пулса тӑрӑшать.
Ҫӗнӗ ҫынпа аслӑ шкулӑн ректорӗ Владимир Иванов педуниверситетӑн ученӑй канашӗн ларӑвӗнче паллаштарнӑ. Ку вӑл иртнӗ эрнерех, юпа уйӑхӗн 26-мӗшӗнче, пулса иртнӗ.
Александр Иванов «тӗллевлӗ хатӗрлессишӗн, тӗллевлӗ вӗренӗвӗн нормативпа право никӗсне йӗркелессишӗн, ӗҫ паракансемпе ҫыхӑну тытассишӗн» яваплӑ.
Аса илтерер, Александр Иванова Чӑваш кӗнеке издательствин пуҫлӑхне лартаҫҫӗ сӑмах тухнӑччӗ. Ун пек калаҫнине Александр Белов журналист тӗнче ттелӗнчи хаҫӑтсенчен пӗринче ҫырнӑччӗ. Апла пулсан, ку хыпар чӑнлӑхпа килӗшсе тӑмарӗ курӑнать.
Чӑваш Енӗн вӗренӳ министрӗнче ӗҫленӗ, унччен республикӑн информаци политикине ертсе пынӑ Александр Иванов ҫывӑх вӑхӑтра епле пукан йышӑнасси паллӑ. Ҫакӑн пирки пурне те пӗлсе тӑракан республикӑри паллӑ журналист Александр Белов пӗлтернӗ.
Вӑл ҫырнӑ тӑрӑх, Александр Иванов Чӑваш кӗнеке издательствин пуҫлӑхӗн пуканне йышӑнӗ тесе шухӑшлаҫҫӗ. Издательство пуҫлӑхӗнче тӑрӑшакан Валерий Комиссаров унти тилхепене вӗҫертӗ ҫеҫ мар, Чӑваш Енри Журналистсен союзӗн ертӳҫинче те ӗҫлеме пӑрахӗ имӗш.
Издательство пуҫлӑхӗнче вӑл 2005 ҫултанпа тӑрӑшать. Учреждени, ҫак йӗркесен авторӗ асӑрханӑ тӑрӑх, юлашки ҫулсенче тӗрлӗ регионти тата чикӗ леш енчи куравсене те час-часах тухса кӗрет, унта Валерий Комиссарова та курма пулать.
Чӑваш Енӗн строительство, архитектура тата ҫурт-йӗрпе коммуналлӑ хуҫалӑх министрне Владимир Михайлова ӗҫрен кӑларас ыйтӑва сӳтсе явнине Чӑваш халӑх сайчӗ пӗлтерчӗ-ха. Унтан тепӗр сӑмах-юмах та тухнӑччӗ: Владимир Михайловӑн министр портфельне каярах пама тивӗ. Ҫакӑ тӳре-шаран шӑпине Мускаври пуҫлӑхсемпе сӳтсе явма тивнипе ҫыхӑннӑ тесе сӑлтавларӗҫ.
РФ Президенчӗн Атӑлҫи федераци округӗнчи полпречӗ Чӑваш Ене килес умӗн харӑсах икӗ министра пукансӑр хӑварни аван мартан йышӑнӑва каяраха хӑварнӑ текенсем те тупӑнчӗҫ. Чӑваш халӑх сайчӗ чӑн сӑлтавне пӗлмест те, анчах ӗнер, юпа уйӑхӗн 27-мӗшӗнче, Владимир Михайлова Михаил Игнатьев тилхепесӗр хӑварнӑ-хӑварнах. Хушӑва Чӑваш Енӗн влаҫ органӗсен официаллӑ порталӗнче вырнаҫтарнӑ.
ЧР сывлӑх сыхлавӗн министрӗн тепӗр ҫумне палӑртнӑ. Ку тивӗҫе Ирина Виноградова пурнӑҫлама тытӑнӗ. Распоряжение ЧР правительствин председателӗ Иван Моторин алӑ пуснӑ.
Ирина Валерьевна унччен Мускав ҫывӑхӗнчи Щелковӑри амӑшлӑх центрне ертсе пынӑ. Унта вӑл мӗн уҫӑлнӑранпах, 2017 ҫултанпа, ӗҫленӗ. Халӗ ЧР сывлӑх сыхлавӗн министрӗн виҫӗ ҫум: Ирина Виноградова, Владимир Дубов тата Ирина Левицкая. Кӑҫал ҫулла икӗ ҫум – Светлана Ананьева тата Алексей Кизилов – урӑх ӗҫе куҫнӑ.
Палӑртмалла: Ирина Виноградова Шупашкарта 1972 ҫулта ҫуралнӑ.
Чӑваш Енӗн вӗренӳ министрӗнче тӑрӑшнӑ Александр Иванов пурнӑҫӗнче паян — пӗлтерӗшлӗ харӑсах икӗ пулӑм. Пӗрремӗшӗ пирки эпир хыпарланӑччӗ. Аса илтерер, Александр Степановича «Чӑваш Республики умӗнчи тава тивӗҫлӗ ӗҫсемшӗн» орденпа чысласси ҫинчен республика Элтеперӗ Михаил Игнатьев хушу кӑларнӑ.
Каярахах тепӗр пулӑм пулса иртрӗ. Александр Иванова республикӑн вӗренӳ тата ҫамрӑксен политикин министрӗн пуканӗсӗр хӑварнӑ. Вӑл хушӑва та Михаил Игнатьев алӑ пуснӑ.
Министр тивӗҫне вӑхӑтлӑх пурнӑҫлама министрӑн пӗрремӗш ҫумӗ пулса тӑрӑшакан Сергей Кудряшова шаннӑ. Асӑннӑ йышӑнӑва та республика ертӳҫи алӑ пусса ҫирӗплетнӗ. Документа влаҫ органӗсен официаллӑ порталӗнче вырнаҫтарнӑ.
Чӑваш Енӗн Патшалӑх Канашӗнчи кадр улшӑнӑвӗсем пирки эпир пӗлтернӗччӗ. Валерий Филимонов спикер ыйтса ҫырнине юпа уйӑхӗн 19-мӗшӗнчи сессире пӑхса тухрӗҫ, парламент ертӳҫинчен те, депутатран та хӑтарчӗҫ. Ҫав кунах ӑна республика ертӳҫи Михаил Игнатьев Чӑваш Енӗн Элтеперӗн Администрацийӗн Ертӳҫин ҫумӗ пулма шанчӗ.
Спикер пуканне йышӑнма пултаракан кандидатсем хушшинче Вӑрнарти аш-какай комбиначӗн пуҫлӑхне Юрий Попова, Чӑваш патшалӑх гуманитари ӑслӑлӑхӗсен институчӗн пуҫлӑхне Петр Краснова тата чӑваш парламенчӗн экономика политикин комитечӗн ертӳҫине Сергей Павлова асӑнаҫҫӗ. Ҫав вӑхӑтрах Чӑваш Енӗн Элтеперӗн Администрацийӗн Ертӳҫи Юрий Васильев пушаннӑ суйлав округӗпе депутата суйланса спикер пулма хирӗҫ маррине «Правда ПФО» тӗнче тетелӗнчи хаҫата пӗлтернӗ иккен.
Спикер тивӗҫне хальлӗхе Альбина Егорова пурнӑҫлать. Вӑл — ЧР Патшалӑх Канашӗн Ертӳҫин ҫумӗ, хысна енӗпе ӗҫлекен комитет ертӳҫи.
Чӑваш Енӗн строительство тата транспорт министрӗ Владимир Иванов «Мегафон» компанийӗнче 15 ҫул каялла ӗҫленине аса илнӗ.
Министр Фейсбукра пӗлтернӗ тӑрӑх, унта вӑл 15 ҫул каялла коммерци директорӗнче тимлеме тытӑннӑ.
Ҫав пукана вӑл ертсе пырас опыта федерацин пысӑк компанийӗнче пухас тӗллевпе кӳлӗннӗ. Коммерци директорӗн пуканне йышӑнас текенсем уҫҫӑн тура 35-ӗн пухӑннӑ. «Мана ӗҫе илнӗ вӑхӑтра Чӑваш Енре 5-6 ҫын ҫеҫчӗ — Чӑваш Енри офис директорӗ Александр Свечников, тӗп йӗркелӳҫӗ Александр Родионов (вӑл кайран Чӑваш Енри МТСа чылай ҫул ертсе пычӗ), техника директорӗ Анатолий Жижко, айти Николай....., сете планлакан Саша Алякин пулнӑ», — аса илнӗ министр 15 ҫул каяллахине. Компани ӗҫченӗсем хӑйсенчен ҫирӗп ыйтнӑ, клиентсене вара хӑвӑрт пулӑшма тӑрӑшнӑ
2004 ҫулхи ҫурла уйӑхӗн 17-мӗшӗ тӗлне, 10 уйӑхра, республикӑра вӑйлӑ сеть йӗркеленӗ, 130 дилер центрӗ уҫнӑ. Коммерци директорӗнче ӗҫленӗ пирвайхи кунне 5 пин абонент «Мегафон» компани пулӑшӑвӗпе усӑ курма пуҫланӑ.
«Мегафонти опыт халӗ мана Чӑваш Енӗн Транспорт тата ҫул-йӗр хуҫалӑхӗн министерствине ертсе пыма пулӑшать», — тесе ҫырнӑ министр.
Чӑваш Енӗн строительство, архитектура тата ҫурт-йӗрпе коммуналлӑ хуҫалӑх министрне Владимир Михайлова ӗҫрен кӑларас ыйтӑва сӳтсе явнине Чӑваш халӑх сайчӗ пӗлтерчӗ-ха. Унта министр ӗҫрен хӑйӗн ирӗкӗпе каясшӑннине хыпарланӑччӗ.
Александр Белов журналист пӗлтернӗ тӑрӑх, министра ӗҫрен каярах хӑтарӗҫ. Элтеперпе министр хушшинчи ӑнланманлӑх иртнӗ эрнекун республикӑри районсемпе хуласен пуҫлӑхӗсемпе йӗркеленӗ канашлура йӑлари каяша турттарас ыйтӑва сӳтсе явнӑ чух сиксе тухнӑ. Хӑйне Элтепер ӳпкеленӗ чух министр ӗҫрен каяссине пӗлтернӗ иккен.
Александр Белов журналист Правительство ҫуртӗнчи ҫӑлкуҫ пӗлтерни тӑрӑх Владимир Михайлов Михаил Игнатьевӑн тусӗн ывӑлӗ пулнине асӑннӑ. Владимир Михайлова ӗҫрен каярах хӑтарӗҫ тенӗ.
Паян Шупашкарта район тата хула администрацийӗсен пуҫлӑхӗсемпе канашлу иртнӗ. «cheb.media сайт пӗлтернӗ тӑрӑх, унта ЧР строительство, архитектура тата ЖКХ министрне Владимир Михайлова ӗҫрен кӑларас ыйтӑва сӳтсе явнӑ. Министр ӗҫрен хӑйӗн ирӗкӗпе каясшӑн-мӗн.
Анчах ку татӑклӑ йышӑну мар-ха, мӗншӗн тесен отставкӑна каяссине РФ Строительство министерствипе татса памалла.
Канашлура Владимир Михайловӑн икӗ доклад тумалла пулнӑ. Пӗрремӗшӗ – хытӑ комуналлӑ ҫӳп-ҫапа пырса тивекенни. Иккӗмӗшӗ – «Хулари хӑтлӑ пурнӑҫа тӑвасси» федераци проектне Чӑваш Енре 2018 ҫулта пурнӑҫласси ҫинчен.
Паян Чӑваш Енӗн Элтеперӗ Михаил Игнатьев Министрсен Кабинечӗн Ертӳҫин ҫумне ҫирӗплетнӗ. Ку должноҫӗ Александр Николаева шанса панӑ. Чӑваш Енӗн правительствин ертӳҫин ҫумӗ регион хӑрушсӑрлӑхӗн ыйтӑвӗсене пурнӑҫлӗ.
Республика ертӳҫи Михаил Игнатьев ӑнлантарнӑ тӑрӑх, яваплӑ тилхепене Александр Николаева вӑл Чӑваш Енӗн Шалти ӗҫсен министерствин тытӑмӗнче ӗҫлес енӗпе пысӑк опытлӑ пулнине шута илнӗ.
Чӑваш Енӗн Элтеперӗн Администрацийӗн пресс-служби пӗлтернӗ тӑрӑх, республикӑра тӑнӑҫлӑхпа хӑрушсӑрлӑх ыйтӑвӗ малти вырӑна тухса тӑрать. Регионсенче пулса пӑтӑрмахсене, Керчь хулинчи трагеди те ҫапла тума хистет-мӗн.
Должноҫе шаннӑшӑн Александр Николаев республика ертӳҫине тав тунӑ, Чӑваш Ен ырлӑхӗшӗн ӗҫлеме шантарнӑ.
+21.3 °C